CEBU CITY– Nanawagan ang inahan sa Choing sisters nga si Thelma Chiong nga mukanaog nalang sa pwestu si Bureau of Corrections (BuCor) Director General Nicanor Faeldon.
Kini subay sa gipahigayong senate inquiry nga gisugdan karong adlawa kalabot sa pagpagawas sa BuCor sa mga ‘convicted criminals’ nga nakahimo og heinous crimes.
Sa ekslusibo nga pakighinabi sa Bombo Radyo Cebu kang Chiong, giingon niini nga dunay mikuha nila ni Josman Aznar, Alberto Caño ug Ariel Balansang ang tulo sa pito sa mga mipatay ug milogos sa iyang anak nga sila Marijoy ug Jacqueline Chiong.
Kombinsido si Mrs. Chiong nga dunay korapsyon sulod sa Bucor ug dunay nagbayad sa tulo sa Chiong 7 para makagawas.
Gani, nagduda pa si Mrs. Chiong nga alalay ang tulo ni Calauan, Laguna Ex-mayor Antonio Sanchez.
Bisan paman og sukwahi sa unang pamahayag ni Mrs. Chiong sa Bombo Radyo Cebu, gikalipay niini ang gipahigayong senate hearing apan gihagit niini ang gobyerno nga muhimo og paagi nga makabalik sa bilanggoan ang mga naasoy nga ‘convicted criminals’.
Sa senate inquiry, gihimakak ni Faeldon nga mipirma kini sa release order nila ni Aznar, Caño, ug Balansag apan iyahang gikumpirmar nga gawasnon na karun ang tulo. (FDP/SBR)
