Nipagawas og statement ang Miss Universe Philippines Organization nga nagkondenar sa pageant vlogger nga si Adam Genato sa performance sa Miss Universe 2024 contestant sa Pilipinas, nga si Chelsea Manalo, kinsa nominado isip unang Miss Universe continental queen sa Asia.
Gitawag sa organisasyon ang komentaryo sa video sa pageant nga vlogger nga dili patas, dili sensitibo, makadaot ug wala’y pagtagad sa mga nahimo ni Chelsea.
Matud pa niya nga dili nila tugutan ang bullying ug iresponsableng vlogging ilabi na gikan sa accredited nga MUPh media partner nga ilang gi-welcome sa ilang mga kalihukan.
Gipahinumdoman usab sa organisasyon ang mga pageant vloggers nga mag-amping sa pagpaambit sa ilang mga komento sa mga kandidato sa Pilipinas.
Ang organisasyon sa MUPh naglaum nga mahimong responsable sa ilang mga komentaryo ug gipang-publish nga content.
Sa video commentary ni Adam sa iyang social media platform, niingon kini nga kon ang 2024 Miss Universe Philippines candidate nga si Ahtisa Manalo o Christi McGarry ang gipadala sa Pilipinas sa Miss Universe karong tuiga, mas maayo unta nga ipakita kini sa international pageant.
Ingon man nga gikomparar usab niya si Chelsea ngadto kang Victoria Theilvig sa Denmark nga gikoronahan isip Miss Universe 2024 nga matud pa nga Barbie-looking.
