CEBU – Kasong pagpatay ug illegal possession of firearm ang giandam batok sa nasikop nga gidudahang kawatan, nga nipatay sa tinun-an nga nursing sa Barangay Buaya, dakbayan sa Lapu-Lapu, niadtong Sabado, Oktubre 15.//
Kini human ang pamilya, mga higala ug schoolmates sa biktima, 18-anyos nga nursing student nga si Johanna Xhyrra Selim, misinggit alang sa hustisya sa iyang kamatayon, ug ang mga kabanay sa biktima sa pag-apelar sa pinansyal nga tabang alang sa iyang paglubong niini.
Matod sa kapulisan nga siya gipusil-patay sa usa ka kawatan kinsa nakit-an sa iyang pamilya sulod sa ilang giabangan nga lawak niadtong Sabado sa kaadlawon, Oktubre 15.
Matud pa ni Police Lieutenant Colonel Jul Muhammad Jamiri, hepe sa Intelligence Unit sa Lapu-Lapu City Police Office,
suspetsado nga kawatan gipusil si Selim sa abaga, dali kining gidala sa tambalanan, apan gideklarar nga dead on arrival.
Human sa nahitabung krimen, niikyas ang suspetsado nga giilang si Roy Cuizon, 42, hinungdan nga nihimo og man-hunt operation ang kapulisan ug sulod sa 10 ka oras nadakpan kini sa Barangay Budlaan, dakbayan sa Sugbo.
Dugang pa, nga si Cuizon, usa ka street vendor, ug adunay mga kabanay sa Budlaan ang pagkasikop gihimo uban sa koordinasyon sa Talamban Police Station sa dakbayan sa Sugbo.
Kasong murder ug illegal possession of firearms ang ipasaka batok kang Cuizon karong adlawa Lunes, Oktubre 17.
Kasamtangang gitanggong sa Lapu-Lapu City Police Station detention facility ang dinakpan nga si Cuizon samtang nagpaabot sa pagpasaka og kaso.
