CEBU CITY – Mutagana ug 300 ka mga sakop ang Muslim community sa Sugbo isip mga force multiplier alang sa pagtabang sa kapulisan sa pagbantay sa seguridad sa Sinulog 2020.
Gipahibalo ni Ustadz Najeeb Razul, Filipino Muslim elder, nga magpahigayon sila ug ‘meeting’ kauban ang kapulisan sa Cebu City Police Office (CCPO) arun nga hisgutan ang security measures alang sa dakong kalihokan sa Sugbo.
Matud pa nga kining 300 ka mga force multiplier ang aduna na’y kasinati-an sa mga nakalabay nga Sinulog Festival, dili lang sa pagbantay sa seguridad inay lakip na usab ang pag-man sa trapiko.
Gisiguro ni Razul nga syento porsyento ang ilahang suporta alang sa dakong kapistahan sa mga Kristiyano sa Sugbo ingon man ang ilahang padayon nga pagsuporta sa mga programa sa City Government.
Apan dili uyon si Razul sa subling pagpahigayon ug ‘signal shutdown’ niining tuiga gumikan kay giingong linaw man karun ug walay hulga, dili susama sa nakalabay nga tuig nga adunay kisaw sa seguridad.
Nagkanayon kini nga walay angayan nga kabalak-an sa umaabot nga Sinulog Festival 2020 kung isiguro lang usab sa kapulisan ang mas hugot nga mga security measures.
Hinuon, sa ilahang bahin, giingong nagsugod na ang ‘monitoring’ sa ilahang intelligence community kung diin gisiguro niini nga luwas lang ang Sugbo.
