CEBU – Nadala sa tambalanan ang duha ka tripulante human nakaangkon ug grabeng paso sa likod nga bahin sa ilang lawas ug naglisod sa pagginhawa.
Kini human nasunog ang MV Trans Asia nga gidunggo sa Barangay Punta Engaño, dakbayan sa Lapu-Lapu.
Sa pakighinabi sa Bombo Radyo Cebu kang CG ENSIGN 2 Abdulsaib Taman sa Lapu-Lapu City Coast Guard, siya nagkanayon nga nakadawat sila og tawag gikan sa ilang command center kalabot sa pagkasunog sa nahisgutang barko hinungdan nga dali silang miresponde.
Sa pag-abot sa maong dapit giingong dako na ang kalayo apan gisuwayan pa unta kini sa pagpawong sa mga mirespondeng bombero.
Matod niya nga unom ka tripulante ug usa ka security guard ang giingong miambak dihang niulbo ang sunog sa barko.
Kasamtangang giimbestigahan ang insidente.
Nasayran nga una nga nasangad ang barko sa nahisgutang lugar sa wala pa ang bagyong Odette.
