CEBU CITY– Nanawagan ang usa ka senior highschool student sa iyang inahan nga wala na niya igkita sulod na sa taas nga panahon.
Si Mark Dave Maravillas, 20 anyos ang mipaambit sa storya sa iyang kinabuhi sa tulumanong Kagahapon Pa lang sa Bombo Radyo Cebu. Gisaysay niini sa ka sayo pa niya nga pangidaron gibiyaan na sila sa iyang inahan nga iyang gihulagway nga ‘dili angayang tawagon nga inahan’.
Kini human nga gipasagdan lang kini og nakiglambigit gihapon sa laing lalaki bisan og naa na silay pamilya. Dugang pa nga nasayran niini nga ang kagahapon sa iyang mama nasuta niini nga usa diay kini ka babae nga mubo ang lupad.Hinungdan nga alang ni Mark Dave, dili kini angayan mahimong inahan.
Apan gitino niini nga bisan paman sa nahitabo, boot gihapon niya nga makita ang iyang inahan nga si Margie Maravillas nga anaa matud pa sa Iligan sa Mindanao.
Bisan paman matud pa sa naagi-an niini sa kinabuhi, boot niya nga paminawon ang habig sa iyang ‘mama’ ug gani boot pa kini niya nga maka-ubang mu-martsa sa iyang graduation sunod tuig.
Gipaambit usab ni Mark Dave nga ang sekreto aron dili madepressed bisan paman sa mga hagit sa kinabuhi, mao ang dili magpaapekto ug magpadala sa mga paglatos sa laing tao. Kung duna matud pa’y problema sa balay, ibilin lang sa panimalay, ug ang problema sa eskwelahan sulbaron sa eskwelahan.
Dako usab ang pasalamat niini sa iyang apohan ug mga uyu-an gumikan kay bisan og kuwang ang iyang ginikanan, wala kini niya gipabati sa iyang pamilya, hinungdan nga naka-ingon siya nga swerte gihapon siya.
Boot usab ipaabot ni Mark Dave nga mensahe sa iyang inahan ang iyang motto nga ‘My generation is way different from theirs’ hinungdan nga gusto usab niya nga masabtan siya sa iyang inahan sa iyang kahi-ubos.
Mensahe usab niini sa mga kaubang millennials, ilabina ang kadtong dali madepressed nga dili mawagtangan sa paglaum. Gihimug-atan niini nga samtang buhi pa, dunay paglaum.
https://www.facebook.com/BomboRadyoCebu963/videos/363020694497015/ (Link sa FB livestreaming sa naasoy nga programa)
