Gitinguha karon sa Cebu City Council nga makabaton og kaugalingong quarantine rooms ang mga barangay sa dakbayan alang sa mga nakabati og sintomas sa corona virus.
Kini human nga gipasar sa konseho ang resolusyon ang pagbaton og isolation room sa sulod sa health centers subay na sa hugot nga pagbantay batok sa 2019 novel coronavirus o 2019 N-CoV.
Matud sa author sa maong resolusyon nga si Kon. Dave Tumulak nga bantayan sa mga health workers ang kinsang makabaton og mga sintomas sama lang sa trangkaso sa sulod sa isolation rooms.
Dugang pa niini nga gisiguro nila ang maong lakang isip kabahin sa precautionary measures, ingon man paglurang sa kabalaka sa publiko kalabot na sa maong sakit.
Samtang gimanduan usab ang City Health Department nga atimanon nga pangandaman ang quarantine rooms, ingon man sa pag-monitor sa kahimtang sa posibleng mataptan og coronavirus.
Sa maong isolated room, adunay kahigdaan ang usa ka suspected patient ug aduna usab kini tubig ug pansayan.
Gihimug-atan usab ni Tumulak nga tuyo nilang ipahimutang ang pasyente sa isolation room aron dili kini makatakod sa mga kauban niini sa panimalay.
