CEBU CITY-Gikompirmar ni Lt. Junior Grade Michael John Encina, ang tigpamaba sa Philippine Coast Guard-7 (PCG) nga napalgan ug naluwas na ang duha ka magti-ayon nga taga Barangay Lagunde lungsod sa Oslob samtang nanagat.
Matud ni Encina nga atol sa ilang gipahigayong search and rescue para sa duha ka na missing nakadawat sila og report gikan sa PCG-Bohol nga napapad ang magti-ayon nga sila Samuel Caldino,52 anyos ug Olimpia Caldino,45 anyos sa probinsya sa Bohol.
Matud usab ni Police Staff Sergeant Noel Munton sa Alboquerque PS nga dunay nakakita sa duha nga nag-utaw-utaw samtang nag-abay sa ilang sakayan sa tunga-tunga sa kadagatan sa Panglao, Bohol ug Oslob, Cebu.
Buhi matud pa ang duha apan luya gumikan sa dugay nga panahon nga kini naglutaw-lutaw sa dagat.
Mahinumduman nga niadtong Biyernes na report nga missing ang duha human nga milawig sa lawod para managat. Nasayran nga nabuslot ang ilang sakayan tungod sa dagkong balud ug gihigot nalang matud pa nila kini sa payaw aron dili sila maanod sa layo.
Gidala dayon kini sa nakakita sa PS ug gidala sa tambalanan para matagaan og atensyong medikal.
Samtang mipasalig si Encina nga mu-assist usab ang PCG-7 sa pagpapauli sa mga magti-ayon.
Mipahimangno usab kini sa mga gagmay nga mananagat subay na usab sa ilang programa nga kung kusog na gani ang mga balud sa dagat bisan paman og walay advisory, dili nalang gyud ahaton pag lawig para makalikay sa disgrasya.
