Gipakusgan sa Cebu City Transportation Office (CCTO) ang ilang operasyon batok sa mga motorista nga nag-counterflow o nagbiyahe sa wala nga bahin sa dalan tungod sa kakuyaw niini sa mga pedestrian ug ubang drayber.
Gilayong gituki ang maong hisgutanan sa tigom sa Traffic Management Committee Board niadtong Marso 6, 2026, diin gihatagan og gibug-aton nga ang counterflowing maoy hinungdan sa mga head-on collision ug kalit nga paglubag sa manibela nga moresulta sa disgrasya, ilabi na sa mga hagipot ug busy nga kadalanan.
Gipakita sa datos ang dakong pagsaka sa mga nadakpan nga nakalapas niini nga balaod sa trapiko. Sa tuig 2025, duna lay natala nga 80 ka Traffic Citation Tickets (TCT) ug 384 ka Temporary Operator’s Permits (TOP), apan karong tuig 2026, niabot na sa 1,593 ang naisyu nga TCT. Nagpasabut kini og hapit 1,900 porsyento nga pagsaka sa mga nadakpan, samtang duna nay 32 ka TOP ang naisyu sa pagkakaron.
Misaka usab ang kinatibuk-ang ihap sa mga citation records sa dakbayan sa niaging mga bulan. Gikan sa 19,191 ka TCT niadtong Disyembre 2025, misaka kini ngadto sa 20,966 niadtong Enero 2026, ug nidugang pa og 6.8 porsyento pag-abot sa Pebrero 2026 diin natala ang 22,394 ka citation.
Matod sa mga awtoridad, kining maong mga numero nagpakita sa mas estrikto nga implementasyon sa balaod sa dalan sa tibuok siyudad.
Gipahinumdoman sa mga opisyal sa trapiko ang mga motorista nga bisan og daw laktod ang counterflowing, nagbutang kini sa kinabuhi sa tanan sa peligro tungod kay mapugos ang ubang sakyanan sa pagpreno og kalit o pagbalhin og lane. Ang CCTO ug ang Traffic Management Committee mopadayon sa pagpahamtang og disiplina sa kalsada aron maseguro ang kaluwasan sa tanang lumulupyo sa Sugbo.
