Nailhan na sa lokal nga kagamhanan sa Mandaue ang usa ka menor de edad nga lalaki nga nakita sa closed circuit television (CCTV) nga nag-vandalize sa usa ka pampublikong tunghaan sa siyudad niadtong Hunyo 10 sa kaadlawon.
Kini human makadawat ang siyudad og report ug impormasyon gikan sa usa ka anonymous individual.
Miatubang kang Mayor Thadeo “Jonkie” Ouano ang inahan sa 16-year-old nga suspect, Huwebes, Hunyo 18.
Isip kabahin sa aksyon sa siyudad, ipaubos ang menor de edad ug ang iyang ginikanan sa usa ka intervention program nga maglangkob sa community involvement service ug counseling. Kini ipatuman pinaagi sa City Social Welfare Services Office (CSWSO) aron matabangan ang menor de edad nga masabtan ang kabug-aton sa iyang nahimo ug mapalig-on ang responsableng pamatasan.
Sumala sa report sa Mandaue City Police Office (MCPO), padayon pa ang imbestigasyon sa ubang miyembro sa grupo nga giingong nalambigit usab sa susamang mga insidente sa ubang barangay sa siyudad.
Gipasiugda ni Mayor Jonkie nga magpadayon ang siyudad sa pagmonitor sa mga nakalapas sa balaod aron masiguro nga matuman ang angay nga silot ug intervention, sa koordinasyon sa mga barangay.
