Nasikop sa operatiba sa National Bureau of Investigation Region 7 (NBI-7) uban sa Visayan Electric Company (VECO) ang usa ka lalaki nga giila nga si Lorenze Solano Torrefiel, alyas “June Pepito,” atol sa entrapment operation sa B. Rodriguez Street niadtong Abril 22, 2026.
Sumala sa mga otoridad, si Torrefiel giakusahan og pagpangilkil og kantidad nga P10,000 gikan sa usa ka kustomer sa VECO bugti sa pag-ayo sa guba nga meter seal.
Dugang pa niini, nga gikatahong nalambigit siya sa iligal nga manipulasyon sa konsumo sa kuryente aron makapanglimbong sa kompanya, nga nakalapas sa Republic Act 7832 o ang Anti-Electricity and Electric Transmission Lines/Materials Pilferage Act of 1994.
Atol sa iyang pagkasikop, giingong mitug-an si Torrefiel nga adunay koneksyon sa usa ka indibidwal nga giila nga si Marvin Gabud.
Tungod niini, gitultolan niya ang mga operatiba ngadto sa pinuy-anan ni Gabud sa Barangay Guadalupe, diin gipahigayon ang follow-up operation.
Apan, nakaikyas si Gabud, samtang padayun pang gipahigayon ang inquest proceedings batok kang Torrefiel, sa City Prosecutor’s Office niadtong Abril 28, 2026.
Sapikas bahin, nagpadayon ang manhunt operation batok kang Gabud, giimbestigahan pa sa mga otoridad ang posibleng mas halapad nga sindikato nga nalambigit sa maong mga iligal nga kalihokan.
