CEBU CITY — “Isolated case” lang ang nahitabong pagpamusil sulod sa buhatan sa Talisay City PNP kagahapon diin giingong nagkutlo sa kaugalingong kinabuhi ang usa ka deputy chief.
Kini ang nahimong paghulagway sa chairman sa Committee on Peace and Order nga mao si City Councilor Gail Restauro human sa maong krimen kagahapon.
Kahinumdumang namatay ang maong deputy chief nga si Police Lt. Praxilo Albiso human gipusil ang iyang kaugalingon samtang patay usab sa pagpamusil ang giingong “lover” niini nga si Vernice Cardino.
Bisan pa man og nagpabiling malinawon ug hapsay ang dakbayan, gi-angkon ni Restauro nga nasagmuyo kini kay nakuwangan pag usab sila og mga sakop sa kapulisan.
Matud sa konsehal nga wala nikuyanap ang gun violence sa lugar samtang mas nipatigbabaw ang anggulong “crime of passion” sa maong insidente.
Dugang pa ni Restauro nga usa ka dakong kawad-on ang kamatayon sa maong police officer apan panahon na gayud aron palig-onon ang seguridad.
Kini gumikan kay nagkinahanglan, matud pa, ang mga tawo sa presensya sa kapulisan maong padayon gihapon ang pagpanerbisyo sa publiko. (report by Bombo Eric Amaro/gn)
