Nahugno ang usa ka bahin sa usa ka dalan sa Bangkok niadtong Miyerkules, Setyembre 24, hinungdan nga nagbilin kini og dakong sinkhole ug nakabalda Dagan sa trapiko, nakadaot sa imprastraktura ug nakaaghat sa mga evacuation sa nagpalibot nga lugar.
Sa pagkahuno, walay kaswalti ang natala apan tulo ka mga sakyanan ang nadaot, ug matod sa gobernador sa Bangkok nga si Chadchart Sittipunt, ang mga opisyal nagtuo nga ang pagkahugno tungod sa nagpadayon nga pagtukod sa usa ka underground nga train station.
Sa usa ka video, nakita nga ang karsada nag hinay-hinay nga naunlod, nilamoy sa nagpalibot nga mga poste, ug nisuway pa ang ubang sakyanan sa pag-atras nunot sa nagkadako nga lungang, hinungdan nga hingpit nga naputol ang 4 lanes nga karsada.
Nunot niini, ang kasikbit nga tambalanan usab nagpahibalo nga ihunong usa ang pagpanirbisyo sulod sa duha ka adlaw bisan paman nga wala kini tumang nadaot, apan tungod kini sa pagbakwit gikan sa police station ug uban pang duol nga mga bilding.
Giputol usab sa mga opisyal ang linya sa kuryente ug tubig sa lugar, samtang ang mga hingtungdan nga awtoridad nagtrabaho aron ayohon ang lungag sa labing paspas nga ilang mahimo taliwala sa mga kabalaka nga ang kusog nga ulan mahimong hinungdan sa dugang nga kadaot.
