Misaka na sa 22 ang ihap sa mga namatay tungod sa bag-ohay lang nga bagyong Inday ug sa habagat sa Nasud.
Sa pinakabag-o nga situational report sa National Disaster Risk Reduction and Management Council (NDRRMC) karong Lunes, Hulyo 13, usa lang ka kamatayon ang gikumpirmar samtang nagpadayon pa ang pag-validate sa ubang mga namatay.
Sumala sa ahensya, usa ka 70 anyos nga lolo ang gikumpirma nga namatay human nalumos sa Barangay Kipaypayon, Quezon, Bukidnon.
Anaa usab sa napulo(10) ang gitaho nga mga namatay ang natala sa Sarangani, unom(6) sa Lanao del Sur, duha(2) sa Bukidnon ug tag-usa sa Iloilo ug Davao Occidental.
Samtang, siyam ka tawo ang gikataho nga nasamdan tungod sa kalamidad ug anaa sa 16 ka tawo ang gikataho nga nawala.
Sa kinatibuk-an, ang hiniusa nga epekto sa habagat-kasadpan ug sa miaging bagyo nakaapekto sa 146,000 ka pamilya o anaa sa 654,000 ka mga indibidwal gikan sa kapin sa 600 ka mga barangay sa tibuok nasud.
Nagpagawas usab ang ahensya og inisyal nga banabana sa kadaot sa sektor sa imprastraktura, nga mokabat sa P3.18 bilyon.
Nagpabilin nga kanselado ang mga klase sa kapin sa 400 ka mga siyudad ug munisipyo samtang ang oras sa klase sa 48 ka lokal nga gobyerno gisuspinde tungod sa dili maayong panahon.
