CEBU CITY-Makabalik sa pagtukod sa ilang mga panimalay ang mga nasunogan sa Sitio Bunay 2, Brgy. Labangon ning dakbayan sa Sugbo bisan paman ug gipanag-iya kini sa pribado nga luna ang ilang nahimutangan.
Mao kini ang gipadayag ni Portia Basmayor, ang head sa Department of Social Welfare and Services kinsang kauban ni Konsehal Francis Esparis sa pag-apud-apod usab sa mga dinalian nga hinabang ngadto sa mga biktima.
Diin anaa sa 75 ka pamilya o 287 ka mga tawo ang apektado sa maong sunog, nga milamoy sa 43 ka mga balay.
Lakip sa mga nadawat nga hinabang sa mga nasunogan mao ang bugas; de-lata; disaster kit nga adunay planggana, kaldero, hygiene kit; ug mga pligo sa sin ug uban pa.
Isunod dayon ang mga plywood niini.
Sa hinabang pinansyal gikan sa kagamhanan sa dakbayan nga ipaagi sa DSWS, ang mga tag-iya ug balay nga naugdaw makadawat og P20,000; P10,000 sa nakig-ipon lang sa balay; ug P5,000 sa mga tag-iya nga wala diha nagpuyo, ug ang lodger o nag-abang.
Gipasalig ni Basmayor papaspasan nila ang paghatag sa hinabang pinansiyal, nga sa iyang pagbanabana matunol nila sulod sa usa ka buwan.
