PROVINCE OF CEBU-Mohatag og pasiunang 5,000 ka sako sa bugas ang National Food Authority (NFA) ngadto sa Cebu Provincial Government agig suporta sa mga programa sa Kapitolyo.
Kini ang gipahibalo ni NFA acting administrator Larry del Rosario Lacson atol sa iyang pakigtagbo kang Gobernador Gwendolyn Garcia sa Kapitolyo niadtong Martes, Abril 30, 2024.
Atol sa ilang tigom, gituki ni Lacson ug ubang mga opisyal ang nagkadaiyang inisyatiba sa Kapitolyo nga nagsalig sa NFA alang sa suplay sa bugas.
Kini nga mga inisyatibo naglakip sa Sugbong Merkadong Barato nga nagtanyag og bugas ngadto sa mga kabus nga Sugbuanon sa tag P20 matag kilo, Sugbo School Feeding Program alang sa mga tinun-an sa publikong eskwelahan sa Sugbo ug Bugasan sa Kababayen-an sa Barangay, nga nagtanyag og bugas sa kantidad nga P27 matag kilo pinaagi sa barangay women’s groups.
Subay niini, ang NFA nangayo og pasensya bahin sa kanihit sa bugas samtang gigarantiyahan nga hatagan niini og prayoridad ang Cebu School Feeding Program kon suplay sa bugas ang hisgutan.
