CENTRAL VISAYAS- Gipanghingusgan sa National Nutrition Council-Central Visayas ang pagselebrar sa National Nutrition Month sa buwan sa Julyo 2026 ubos sa tema nga “Sa PPAN: Sama-sama sa Nutrisyong Sapat Para sa Lahat! Nutrisyon at Kalikasan, Ating Pangalagaan,” diin gibida ni Piladelfa S. Gaviola, member sa Philippine Nurses Association ang kamahinungdanon sa tema aron maoy magsilbing giya sa pagsulbad sa problema sa malnutrition sa Pilipinas.
Matud ni Gaviola, nga subay sa pagselebrar sa nutrition month, mahinungdanon usab ang pagpanalipod sa kalikupan inubanan sa pagpakabana sa nutrisyon, gumikan kay sigon niini kung dili hatagag pagtagad ang eco-system, maapektuhan usab ang food chain lakip na ang panglawas sa publiko.
Sigon niini nga usa sa iyang mga nakitang rason sa nagkataas nga kaso sa stunted growth hilabi na sa mga bata, mao ang dili balanse nga lifestyle, lakip na niini ang dili pagpili og tukma nga pagkaon, ug dili consistent nga pagpahigayon sa active lifestyle, rason nga nakapaubos sa abilidad sa mga bata.
Hinungdan nga nagpahigayon og nagkadaiyang mga intervention programs ang buhatan sa NNC-7 lakip na ang mga programa nga maykalabutan sa wellness sa mga bata nga makapa boost sa abilidad subay na ang paghatag og pagtagad sa nutrisyon.
Gihimug-atan ni Gaviola, nga mahinungdanon ang pagpahibalo og pagpakatap sa mga intervention programs lakip na ang pagsusi sa sitwasyon sa nutrisyon sa mga bata sa Central Visayas aron mahatagan og tukma nga kasulbaran ang malnutrisyon ug padayung pagtaas sa stunted children.
Base sa record NNC-7, adunay 22.7% nga natala ugika-13 sa kinatibuk-an sa nasud sa adunay taas nga kaso sa mga malnourished children, 40, 000 ka mga stunted children, 19,000 sa mga underweight ug 7,000 ang wasted children, samtang 12,000 ang kaso sa overweight.
Nanawagan usab si Gaviola, nga kinahanglan nga hatagag pagtagad sa mga ginikanan ang nagkataas nga kaso sa malnourished, og midugang nga dili magsalig sa mga hinabang sa kagamhanan og maningkamot sa paghatag ug igo nga nutrisyon sa mga bata.
