Nagplano nga moduwa sa EuroLeague ang beteranong Bigman nga si Jonas Valančiūnas bisan pa sa malampusong karera niini sa National Basketball Association (NBA).
Sa pagsugod sa free agency, si Valančiūnas na-trade gikan sa Sacramento Kings ngadto sa Denver Nuggets, samtang aduna pa siyay $20-milyones nga nahabilin sa iyang kontrata.
Apan, ang kampo sa Bigman miingon nga siya naghunahuna nga moduwa sa European basketball league human gitanyagan sa koponan nga Panathinaikos Athens.
Ang beterano nga sentro anaa karon sa Athens samtang nagpadayon ang negosasyon alang sa iyang umaabot nga kontrata kung magpadayon siya sa pagdula sa Europe ug mobiya sa NBA.
Si Valančiūnas unang gi-draft sa NBA niadtong 2011 isip ikalima nga overall pick diin gipili siya sa Toronto Raptors apan human sa pipila ka mga season uban sa team, mibalhin usab siya sa Memphis Grizzlies, New Orleans Pelicans, ug Washington Wizards.
Sa miaging season, ang 33-anyos nga si Valančiūnas nag-average og 10.4 points, 7.7 rebounds ug 2.0 assists matag duwa.
Kung moapil siya sa Panathinaikos, gilauman nga ipares siya sa beteranong magdudula sa EuroLeague nga si Mathias Lessort diin ang duha gikonsiderar nga labing kusgan nga sentro sa liga.
Ang Panathinaikos karon naghupot sa pito ka EuroLeague championships ug usa ka International Cup.
