Maglusad sa ilang parallel investigation ang National Bureau of Investigation – Central Visayas (NBI-7) sa hit-and-run incident sa Maria Luisa Village, Barangay Banilad ning dakbayan sa Sugbo niadtong Pebrero 8 nga gikalambigitan sa suspek nga si Sean Andrew Pajarillo ug sa biktimang si Kingston Ralph Cheng.
Kini human ang maong panghitabo kay nakapaulbo sa kabalaka sa publiko kabahin sa pagmaneho nga hubog o implewensyado sa ilimnong makahubog diin si Pajarillo kay nakainom nga nagmaneho og sakyanan nga nakadasmag kang Cheng niadtong nahisgutang adlaw.
Gilusad sa NBI-7 ang imbestigasyon sa motu proprio bisan paman nga ang Cebu City Police Office (CCPO) kay nakapasaka na og kaso tungod sa atensyon sa publiko .
Ang gipanglantawan sa NBI-7 nga susihon kon ang mga kaso ubos sa Anti-Drunk and Drugged Driving Act magpabilin ba nga balido ug aron masusi kon ang kasamtangang mga balaod igo ba nga nagtubag sa tanang aspeto sa responsibilidad nga naglibot sa insidente.
Sa pagkakaron, ang NBI-7 kay nagpadayon pa sa ilang case-build up sa ilang pag-request sa kopya gipang-transmit nga dokumento sa kapulisan ngadto sa prosecutor aron palig-unon ang kaso ubos sa maong special law ug sa ilang pagpaabot sa appearance sa habig sa kabanay sa biktima sa ilang buhatan.
