Gipahibalo sa National Bureau of Investigation (NBI) nga ila ng giandam ang subpoena alang kang Art Samaniego, ang tech editor sa Manila Bulletin, tungod sa pasangil nga iyang gimando ang pag-hack sa mga pribadong kompanya ug website sa gobyerno.
Matod ni NBI deputy spokesperson Sean Michael Dangilan, ang subpoena basi usab sa extrajudicial confession sa nadakpan nga suspek, usa ka IT officer sa nasangpit nga media outlet, kinsa nagkanayon nga iyang gi-hack ang mga website ubos sa mando ni Samaniego.
Mahinumdoman nga gidakop sa mga awtoridad ang IT officer nga giingong nanghack sa mga website sa militar, National Security Council, ug pipila ka mga bangko.
Diin giingon nga gihack ang pipila ka mga websites ubos sa mando ni Samaniego alang gamiton sa iyang column sa social media platforms.
Gidugang pa nga ang tuyo sa subpoena mao ang pag-imbestigar sa mga pasangil batok ni Samaniego, kinsa giawhag nga personal nga modangop sa NBI aron pagpasabot sa iyang habig.
Ingon man nga hugtanong gipanghimakak ni Samaniego, kinsa maoy Senior Technology Officer sa maong Publishing Corp.
Matod niya, dugay na siyang nakigtambayayong sa mga ahensya sa gobyerno sa natad sa cybersecurity.
