CEBU – Gipaabot pa sa National Bureau of Investigation Cebu District Office ang resulta sa forensic examination sa mga nakompiska nga computers ug electronic devices aron mapasakaan og kaso ang mga empleyado ug tag-iya sa usa ka kompanya sa dakbayan sa Sugbo tungod sa giingong cyber crime-related niini nga mga kalapasan.
Ang NBI-CEBDO niadtong Nobiyembre 15, nipatuman og Warrant to Search, Seize, and Examine Computer Data (WSSECD), batok sa mga tag-iya, empleyado, ug nagpuyo sa usa ka kompaniya sa Barangay Lahug, dakbayan sa Sugbo tungod sa giingong illegal nga pag-access.
Kung diin masilotan kini ubos sa section 4 a sa Republic Act 10175 o ang Cybercrime Prevention Act of 2012, ang WSSECD giisyu sa Regional Trial Court branch 11 sa dakbayan sa Sugbo.
Walay pagdakop nga gihimo atol sa pagpatuman sa WSSECD, apan daghang mga yunit sa kompyuter, laptop, removable storage media, server, ug mga router, ang nasakmit gikan sa opisina sa kompanya.
Ang mga nasakmit nga mga kompyuter ug kagamitan kasamtangang gipaubos sa forensic exeminations ug ang mga butang i-imbentaryo unya ug ibalik sa korte.
Gihimo ang maong operasyon human ang NBI-CEBDO nakadawat og reklamo gikan sa usa ka Japanese corporation nga giingong dunay laing kompaniya nga nigamit sa ilang computer program.
Sa imbestigasyon niini, nasuta sa NBI nga ang kompanya nga nakabase sa Sugbo maoy giingong nigamit sa customized application ug related sub-process nga walay awtoridad gikan sa Japanese firm.
