Nagpositibo sa gunpowder residue test ang usa ka volunteer sa National Bureau of Investigation nga nadakpan human sa pagpamusil sulod sa Senado, matod sa Southern Police District Domingo sa gabii.
Sumala ni Police Lt. Margaret Panaga, gipakita sa resulta sa residue test nga ang suspek, nga giila sa alyas nga “Mel Oragon,” positibo sa presensya sa gunpowder.
Ang suspek gidakop human sa insidente ug gipailalom sa inquest proceedings alang sa nagkadaiyang kaso lakip na ang paglapas sa Republic Act No. 10591, alarm and scandal, direct assault, trespass to property, ug paglapas sa Senate security protocols.
Kahinumduman nga ang insidente nahitabo niadtong Miyerkules sa gabii sa ikaduhang andana sa Senado atol sa lockdown, nga nakahatag og kahadlok ug kagubot sulod sa building.
Base sa inisyal nga imbestigasyon, usa ka wala pa matino nga kalibre sa pusil ang giingong gigamit sa suspek sa pagpabuto og daghang bala sulod sa Senate compound sa GSIS area mga alas-7:50 sa gabii.
Padayon pa ang imbestigasyon sa mga awtoridad aron matino ang motibo sa pagpamusil ug ang posibleng koneksyon sa suspek.
Samtang, giingon sa abogado ug asawa sa suspek nga siya usa lamang ka drayber sa usa sa mga operatiba sa National Bureau of Investigation ug dili regular nga empleyado sa ahensya.
