Gisupak sa National Bureau of Investigation (NBI) ang mga pamahayag sa 18 ka mga marinero nga nag-angkon nga gigamit nila ang air taxi flights sa paghatod og mga maleta nga puno sa kuwarta ngadto sa balay ni Ferdinand Marcos Jr. sa Ilocos Norte.
Matod ni NBI Director Melvin Matibag, wala’y nakitang flight logs o opisyal nga rekord sa biyahe nga magpamatuod sa giingong mga flight nga gigamit sa paghatod sa maong mga maleta nga kuwarta.
Gipahayag ni Matibag nga gisusi sa NBI ang mga flight records sa 2023 ug 2025, apan wala’y nakitang dokumento nga magpakita nga si Zaldy Co o uban pang mga opisyal adunay mga biyahe padulong sa Ilocos Norte.
Ang reaksyon sa NBI misunod sa naunang alegasyon ni Sgt. Belnard Tube, nga nag-ingon nga giuban siya ni Co sa usa ka biyahe paingon sa Ilocos Norte aron ihatod ang maleta nga puno sa kuwarta ngadto sa presidente.
Ang NBI maoy gitahasan sa pag-imbestigar sa mga alegasyon nga gibutyag sa 18 ka mga marinero, nga nag-angkon nga sila ang nagdala og mga maleta nga adunay kuwarta nga gihatag ngadto sa nagkadaiyang opisyal sa gobyerno, lakip na si Presidente Marcos.
Sa pagkakaron, nagpadayon pa ang imbestigasyon sa NBI aron masuta ang kamatuoran sa maong mga alegasyon ug kung adunay ligal nga basehan alang sa posibleng pagsaka og kaso batok sa mga nalambigit.
