CEBU – Andam ang National Capital Region Police Office nga makigtambayayong sa kapulisan sa Police Regional Office (PRO) 7 kalabot na sa pakigbatok sa iligal nga drogas.
Giangkon ni NCRPO Director Major General Debold Sinas nga kadaghanan sa mga shabu nga nasakmit ang nagagikan sa NCR hinungdan nga kung mangayo ug assistance ang PRO 7 hayan andam ug tagana kining makigtinabangay.
Matud pa ni M/General Sinas nga nakig-alayon kini sa nagkadaiyang sektor sa kaulohan sa pakigbatok sa ginadiling drogas ug gani aduna pa kini close coordination sa National Bilibid Prison diin kanunay niini nga mahinabi ang kadagkuan sa maong jail facility arun nga hisgotan ang dagan sa iligal nga drogas sa NCR.
Sa matag police station sa kaulohan nga makapahigayon ug operasyon diin ginagmay lang ang shabu nga makuha, giingong gimandoan kini niya nga dapat human sa duha nga tulo ka operasyon, gikinahanglan nga ma-elevate na ang ubang level ug dinagko na ang masakmit nga iligal nga drogas.
Nagkanayon si Sinas nga gidala niini ang iyahang kasinati-an sa Sugbo didto karun sa kaulohan, ingon man nga nagmalipayon kini sa iyahang bag-o nga assignment.
