Ipa-ilalom sa full alert status ang tibuok National Capital Region (NCR) sugod sa Lunes dungan sa pagsugod sa impeachment trial ni Bise Presidente Sara Duterte.
Matud sa hepe sa National Capital Region Police Office (NCRPO) nga si PMGen. Anthony Aberin, gikan sa kasamtangang heightened alert status, usbon ug tas-an pag-usab ang kaandam sa kapulisan human sa tulo ka adlaw nga lihok-protesta sa Iglesia ni Cristo (INC).
Samtang gipadayag sa Philippine National Police (PNP) nga andam na ang tanang security preparations alang sa impeachment trial sa bise presidente.
Diin mokabat sa 6,000 ka mga pulis ang i-deploy sa palibot sa Senado aron masiguro ang kalinaw ug seguridad sa pagsugod sa pagdungog.
Sumala ni PNP Public Information Office chief PCol. Allen Rae Co, gimandoan na ni PNP chief PGen. Jose Melencio Nartatez Jr. ang tanang pulis nga magpabilin nga disiplinado, walay pabor-pabor, ug nakatutok sa paghatag og serbisyo sa publiko.
Gipasabot pa ni Nartatez nga ang pagtaas sa alert status kabahin sa padayon nga pagtimbang-timbang sa sitwasyon aron masiguro nga igo ang mga lakang pang seguridad samtang girespeto ang tawhanong katungod.
