CEBU PROVINCE-Gihangup ni Negros Oriental Gobernador Manuel “Chaco” Sagarbarria ang sugyot sa Probinsiya sa Sugbo nga ablihan og balik ang mga pantalan alang sa mga baboy gikan sa mga lungsod sa Negros Oriental nga wala na apektado sa African swine fever (ASF).
Nagkanayon si Gov. Sagarbarria, nga tumong sa iyahang pakigkita ni Gobernador Gwendolyn Gwendolyn Garcia niadtung Huwebes, aron hisgotan ang posibleng pag-abli sa mga utlanan alang sa pagsulod ug paggawas sa mga buhing baboy, genetic materials ug pork meat products ug byproducts ngadto ug gikan sa duha mga probinsya.
Matud ni Sagarbarria nga ang mga farmer sa baboy sa Negros Oriental naglisud sa pagbaligya ug pagpadala sa karne sa baboy ngadto sa ubang mga probinsya ug rehiyon tungod sa ASF color-coding ug mapping zone.
Mohangyo si Sagarbarria kang Garcia nga tugotan ang mga farmer sa baboy gikan sa ilang mga lungsod nga adunay status nga “green zone” nga ipadala ang ilang mga baboy sa Sugbo aron malikayan ang oversupply.
Kini gumikan kay iyang namatikdan nga ang Probinsiya sa Sugbo maoy usa sa kinadak-ang merkado sa Negros Oriental bahin sa industriya sa baboy, ug midugang nga ang mga baboy gikan sa iyang probinsiya maoy labing maayong pilion sa mga tigbaligya og lechon sa Sugbo.
Kung kahinumduman nga niadtong Mayo, ang Bureau of Animal Industry (BAI) nagbutang sa mga lungsod sa Dauin ug Sibulan sa Negros Oriental sa “red zone” ubos sa color-coding classification nunot sa pagkakita sa ASF.
Kini nagdili sa duha ka lungsod sa pag-eksport sa mga buhi nga baboy, karne sa baboy ug mga produkto nga adunay kalabotan sa ubang mga lugar.
