Nagpagawas usab usa ka kusog nga pahayag si Israeli Prime Minister Benjamin Netanyahu batok sa Prime Minister sa UK nga si Sir Keir Starmer, Presidente sa France nga si Emmanuel Macron, ug Prime Minister sa Canada nga si Mark Carney.
Gipaanginlan niya sila nga nagsuporta sa Hamas human nila gisaway ang mga makalilisang nga mga binuhatan sa Israel ngadto sa Gaza.
Sumala ni Netanyahu nga ang mga lider sa Britain, France, ug Canada nagsuporta sa “mass murderers, rapist, baby killers, ug kidnappers” nga giingong sakop sa Hamas.
Ang pahayag ni Netanyahu naggikan sa ilang mga komento nga nagkondena sa operasyon sa Israel sa Gaza nga “disproportionate” ug nag-ingon nga kini nagpahinabo sa usa ka “intolerable” nga humanitarian crisis.
Samtang, ang Downing Street wala pa direkta nga mitubag sa mga akusasyon, apan ilang gipunting ang miaging pahayag ni Sir Keir Starmer nga nagkondena sa antisemitism ug pag-atake sa Washington DC sa Amerika.
Kahinumdoman nga ang panaglalis naggikan sa nagpadayon nga panagbangi sa Gaza, diin gibanabana nga kapin sa 53,000 ka mga tawo, lakip ang mga bata, ang napatay sukad kaniadtong Oktubre 2023.
