NEW ZEALAND-Viral karon ang Parliamentary speaker sa New Zealand nga si Trevor Mallard human nga gikugos niini ug gipatotoy ang usa ka buwan palang nga masusong anak sa usa ka magbabalaud samtang nagpahigayon ug debate.
Ang maong masuso ang anak sa magbabalaud nga si Tamati Coffey kinsang bago lang nabalik gikan nagpaternity leave.
Makita sa video nga si Mallard nagkugos sa puya samtang gipatotoy gamit ang bibiron.Gani wala nadistract ang speaker tungod kay nagpokos usab kini sa debate diin siya pa usab ang nagpahimangno sa mga debaters sa ilang oras.
Tungod niini, gi-uwan og pagdayeg ang speaker sa social media diin nagkanayon ang mga nitezens nga maayong pamatasan ang gipakita ni Mallard.
Nagkanayon usab ang uban nga bisan paman ug gamay lang nga nasud ang gisilbihan ni Mallard, naghatag usab kini og dakong pagtulun-an sa kalibutan.
Nasayran nga sa nakalbay nga tuig, ang New Zealand Prime Minister nga si Jacinda Ardern nakahimo usab og kasaysayan sulod sa hapit 30 ka tuig sa iyang paglingkon human nga nagdala kini og bata sa iyang opisina.
Nahimo usab nga dakong hisgutanan ang pagdala sa iyang bana sa ilang anak atol sa United Nations assembly.
Ang pagdala ug mga bata sa mga government buildings ang talagsaon sa ubang nasud ug pipila ang gidili pa. Sama nalang sa representative sa Kenya kinsang nataktak human nga gidala niini ang iyang anak sa debating chamber.
Apan sa ubang nasud positibo kining gihangop.
Ang usa ka British lawmaker nga si Jo Swinson ang nagdala usab sa iyang masusong anak sa usa ka parliamentary debate sa nakalabay nga tuig samtang ang Australian legislator nga si Larissa Waters ang nagbreastfeed pa sa iyang anak samtang naa sa parlamento niadtong 2017.
