CEBU CITY-Gikalipay gihapon sa bag-ong kinasal nga magtiayon human nakadawat sa sagradong sakramento sa kaminyoon, bisan pa man sa mga hagit nga dala sa pandemya.
Kini human nga gikasal ang managhigugma nga sila si Natasha Villasin ug Jon Ermac, taga-Liloan, Cebu pinaagi sa virtual wedding.
Sa tulumanong Good Morning Philippines (GMP) sa Bombo Radyo Cebu gisaysay nila ni Mr. and Mrs. Ermac ang engrande nilang kasal ubos sa ‘new normal’.
Gipahigayon ang maong kasal sulod sa simbahan diin ang ginikanan lang sa magtiayon ang nitambong ug gisibya kini pinaagi sa video conferencing.
Kini aron nga makita usab sa mga kabanay ug mga principal sponsors sa maong bongga nga seremonyas. Sumala pa ni Natasha nga nisunod sila sa mga protocols sama lang sa pagsul-ob og face mask, physical distancing, ug gipatuman ang limitadong ihap sa mga bisita sulod sa simbahan.
Gi-angkon sa magtiayon nga dili sayun ang mga pagpangandam alang sa new normal nga wedding apan nahimo kini pinaagi sa kugihan nga wedding organizers.Tungod niini, nakadaginot silang Mr. and Mrs. Ermac og 50 porsyento sa ilang actual budget gumikan sa new normal nga kasal.
Samtang nahimong bibo ang reception sa magtiayon gumikan kay nihatag og gasa ang ilang mga principal sponsors pinaagi sa online transactions.
Bisan pa man sa kabag-uhan karon sa panahon dala sa pandemya, nagpasalamat ang magtiayon kay natagamtaman gayud ang kasagrado sa kaminyoon human sa pito ka tuig nga relasyon. | GN
