Nalabwan sa National Food Authority ang ilang gi-upgrade nga rice procurement target sa unang unom ka bulan sa tuig, pinaagi sa mga lakang sa NFA Council nga gipangulohan ni Agriculture Secretary Francisco Tiu Laurel, Jr. sa pagpataas sa mga presyo sa pagpalit, pagpalig-on sa nasudnong buffer stock ug pagdugang sa kita sa mga mag-uuma.
Diin ang ang pagpalit sa bugas humay sa NFA niabot sa dul-an 3.37 milyones ka 50-kilo nga sako, nga milapas og gamay sa gi-upgrade nga target nga 3.36 milyones ka sako.
Sa pagkakaron, ang kinatibuk-ang imbentaryo igo na aron matabonan ang upat ka adlaw nga national bufferstock kung adunay mga emerhensya o kalamidad.
Gipamatud-an ni NFA Acting Administrator Larry Lacson ang saad sa ahensya nga magpadayon kini sa pagpalit og bugas sa mas taas nga presyo kaysa mga negosyante, agi’g pagtubag sa mga panawagan sa mga mag-uuma alang sa padayon nga suporta.
Uban sa kinatibuk-ang budget nga P17 bilyones nga gigahin alang sa pagpalit sa bugas karong tuiga, apil na ang rollover funds gikan sa miaging tuig, ang NFA nagpabilin gihapon og mga P12 bilyones alang sa rice procurement sa mosunod nga unom ka buwan sa tuig.
Nagtanyag usab ang Departamento sa lain-laing mga programa nga makatabang sa pagpalambo sa produksiyon sa bugas, lakip na ang suporta gikan sa Rice Competitiveness Enhancement Fund ubos sa Rice Tariffication Law.
Kini nga mga paningkamot sa gobyerno gitumong sa pagpataas sa panginabuhi sa mga mag-uuma, ug pagsiguro nga makadawat sila og patas nga kita sa ilang kahago ug dedikasyon sa produksiyon sa agrikultura.
