CEBU CITY– Angayan ug maka-angayon lamang nga makita sa mga katawhan ang kaanindot sa komunidad pinaagi sa ilang mga mata.
Kini ang nahimong rason kung ngano nga mi-boluntaryo ang usa ka opthalmology student sa gipahigayon nga Bombo Medico 2019 sa Bombo Radyo Philipppines karong adlawa sa dakbayan sa Sugbo.
Matud ni Adam Ybrahim, ang opthalmology student sa South Western University nga malipayon pa gihapon kini isip volunteer sa ikaduhang higayon bisan paman ug duna usab pagkakapoy.
Nakat-unan matud pa niini nga mugahin og kaugaligong kapasidad para makatabang sa mas nanginahanglan.
Dugang pa niini, andam sa gihapon nga mutabang ang sama nila tungod kay nakat-unan na niini ang mga values sa mga Pilipino nga magpakabana sa isig ka tao.
Samtang mi-uyon usab ang lain pang Nigerian volunteer nga si Yanas Musa, usa ka nautical science student sa samang tunghaan.
Matud ni Musa nga nindot sa pamati nga makatabang sa nanginahanglan ilabina nga ang mga beneficiaries sa Bombo Medico ang dili gyud maka-afford sa mga pribadong tambalanan.
Nalipay usab kini nga nakita niya nga mipahiyom ang mga tao nga iyang natabangan.
Gipili sa duha nga magtoon sa Pilipinas tungod kay dili lamang affordable ang tuition fee, de-kalidad usab ang matud pa ang edukasyon.
