Gipaambit sa food vlogger nga si Ninong Ry ang emosyonal nga journey nga naagian nila sa iyang kapikas nga si Belle sa wala pa matawo ang ilang anak nga si Rafa, kinsa bag-o lang nagsaulog sa iyang unang bulan.
Sa usa ka social media post, gibutyag ni Ninong Ry nga nakaagi sila og duha ka miscarriage sa wala pa sila gipanalanginan pag-usab og laing pagmabdos.
Sa ulahi, nadayagnos nga adunay Antiphospholipid Syndrome (APAS) si Belle, usa ka kondisyon nga mahimong hinungdan sa balik-balik nga miscarriage ug nagkinahanglan og tukmang medikal nga pag-atiman.
Tungod niini, miagi si Belle sa medikal nga pagtambal, lakip na ang adlaw-adlaw nga pag-inject sa tambal aron makatabang sa pagpadayon sa iyang pagmabdos.
Bisan pa sa mga pagsulay ug kalisod nga ilang naagian, malampusong natawo nga luwas ug himsog si Rafa, nga ilang giila isip ilang “rainbow baby” o simbolo sa paglaom human sa kasinatian sa pagkawala sa gisabak.
