Ipatuman sa siyudad sa Sugbo sulod sa 30 ka adlaw ang memorandum alang sa “No Segregation, No Collection” nga polisiya sa tanang barangay sa Sugbo aron mapugngan ang dako nga alkanse sa panudlanan sa dakbayan.
Kini ang gipadayag ni Cebu City Mayor Nestor Archival isip kabahin sa mas hugot nga kampanya sa pagdumala sa basura, human sa malampusong pilot testing diin gitumong sa pagpakunhod sa gidaghanon sa mga basura nga madangat sa landfill.
Ubos sa maong polisiya, gikinahanglan nga e-segregate sa mga panimalay ug mga establisemento ang ilang mga basura gikan pa sa source niini. Ang mga basura nga wala ma-segregate ug gisagol ang lain-laing matang dili na kolektahon sa mga awtoridad.
Matud ni Archival nga tumong sa lakang nga maminusan ang basura sa mga landfill ug maibanan ang dakong bayranan sa siyudad sa pagdumala sa basura.
Samtang sa pikas bahin, gihatagan sa DENR-EMB 7 ang dakbayan og 90 ka adlaw aron tumanon ang cease-and-desist order sa SRP Transfer Station. Apan, gipaspasan na sa kagamhanan ang clearing operations nga gilauman nga mahuman sulod sa duha ka semana.
Apan nihangyo si Archival sa DENR nga hingpit nang ilibkas ang cease-and-desist order sa Binaliw Landfill, diiin nasayran nga partially nga gibuksan ang maong pasilidad alang sa pribadong sektor aron didto molabay ang mga basura sa dakbayan.
Sa pagkakaron, nakasinati ang siyudad og kapin P4.2 milyon nga pagka-alkanse matag adlaw tungod sa paghakot sa basura padulong sa Aloguinsan. Apan kung hingpit nang maablihan ang Binaliw Landfill, gilauman nga moubos ngadto sa P2.1 milyon ang adlaw-adlaw nga gastohan ang siyudad.
