CEBU – Di mo-minos sa 70 ka mga ayroplano ang nakagawas og nakasulod gikan sa Mactan-Cebu International Airport (MCIA) human giablihan ang gipamubo nga runway mga alas 5 buntag karung adlawa.
Sa usa ka press conference, gipahibalo ni Atty. Glenn Napuli, ang assistant general manager sa MCIA, nga bisan og giablihan na usab nila ang departure ug arrival, mahimo ra ang nahisgutang operasyon gikan sa alas 5 sa buntag hangtod sa alas 5 sa hapon.
Sa maong mga numero, 36 niini ang departure ug 26 ang arrivals.
Matod ni Atty. Napuli, nagsugod ang operasyon sa airport karong adlawa, hangtod sa sunod nga 14 ka adlaw.
Matod niya, ipadayon nila ang ilang 24/7 nga operasyon kon matangtang ang Korean Air plane nga nag-overshot sa runway sa MCIA, ug human nila ayuhon ang mga suga nga naguba sa ayroplano.
Kalabot niini, gibanabana nga mahibalik na ang normal nga operasyon sa tugpahanan sa buwan sa Nobyembre.
Sa pagkakaron nagpadayon ang clearing operation ug gikinahanglan nga ilang ibalhin ang nasangpit nga ayroplano, 200-metros gikan sa runway alang sa kaluwasan sa mga umaabot nga eroplano.
