North Korea, gisirad-an ang ilang mga utlanan sa South Korea

Nakahukom ang North Korea nga ilang sirad-an ang tanang karsada ug riles nga nagdugtong sa South Korea.

Ang maong lakang nunot sa pamahayag ni North Korean leader Kim Jong Un nga putlon nila ang relasyon sa South Korea.

Giingong nanguna sa pagbabag ang Korean People’s Army sa ilang mga utlanan sa South Korea.

Una usab niini, gipahibalo sa militar sa South Korea nga sukad sa Enero, gipalig-on sa North Korea ang mga depensa sa utlanan pinaagi sa pagbutang og mga minahan sa yuta, paghimo og mga anti-tank traps ug pagtangtang sa imprastraktura sa riles.