CEBU CITY-Nabalhog karun sa prisohan ang usa ka nasikop nga carnapper nga gikatahong nangawat og motor sa iyahang silingan.
Mao kini ang gibutyag sa Hepe sa Mambaling Police Station nga si Major Jonathan Taneo.
Matod pa nga ang suspetsado usa ka notadong carnapper sa maong lugar.
Giila kini nga si Kyle Samonte, 26-anyos, nga lumulupyo sa Alumnos St., Brgy. Basak San Nicolas, ning Dakbayan sa Sugbo.
Samtang, giila ang silingan niini kinsa nanag-iya sa gikawat nga motor sa suspetsado nga si Rheynon Joshua Villahermosa.
Na-rekober sa mga sakop sa kapulisan sa Mambaling Police Station ngadto kang Samonte, uban sa motorsiklo sa biktima, mao ang laing duha ka motorsiklo nga gituohang gikawat sa suspek sa Gaisano Jai-alai sa Barangay Mambaling, Cebu City sa nakalabay nga Lunes, Oktubre 16.
Gibutyag usab ni Taneo nga aduna nay rekord ang suspetsado sa milabay nga tuig 2019 gumikan sa susamang krimen.
Sa pikas bahin, wala gihimakak sa suspek ang krimen nga gibuhat ug mi-angkon nga nabuhat lang niya ang maong matang sa buhat gumikan sa kalisod sa kinabuhi.
Gibutyag usab niini nga naa na sa upat hangtod sa lima ka mga motorsiklo ang iyahang na-carnap.
Kasamtangang gihikayan ang kasong kalapasan sa RA 10883 o Anti-Carnapping Law Act of 2016 si Samonte.
