Giklaro sa buhatan sa National Security Council nga walay sensitibong impormasyon nga na-leak gikan sa Pilipinas.
Mao kini ang gipasalig ni National Security Council (NSC) Assistant Director General Jonathan Malaya human nigawas ang taho nga gibaligya sa usa ka US Army intelligence analyst ngadto sa China ang sensitibong impormasyon sa pipila ka mga nasud lakip na ang Pilipinas.
Matod niya nga wala nabalaka ang ahensya tungod kay naandan o regular nga kalihokan ang military drills sa nasud.
Gitumbok ni Malaya ang regular military exercise nga gihimo sa Pilipinas sa mga kaalyadong nasud sama sa US diin ang 2 ka nasud adunay tinuig nga Balikatan exercises sa tumong nga mas mapalig-on pa ang kapabilidad sa depensa sa US ug PH.
Samtang, sa bahin sa Armed Forces of the Philippines (AFP), ang tigpamaba sa ahensya nga si Col. Francel Margareth Padilla nga alerto kanunay ang militar sa pagpanalipod sa integridad ug loyalty sa ilang mga personnel.
Matod niya bisan pa nga ang AFP nagpabiling alerto sa bisan unsang posibleng external influences, siya miingon nga adunay gi-assign nga mga units nga nagpahigayon og kompletong background investigations aron masiguro nga sila magpabilin nga pasalig sa ilang mga katungdanan ug aron masiguro ang seguridad sa atong nasud.
