Susamang gipaniguro sa National Security Council (NSC) ug Armed Forces of the Philippines (AFP) nga aduna silay epektibong counter intelligence batok sa giingong langyaw nga mga espiya nga naglihok sa Pilipinas.
Matod ni NSC Assistant Director General Jonathan Malaya, epektibo ang kontra intelligence efforts sa gobyerno batok sa mga langyaw nga espiya sa nasud.
Mao kini ang reaksyon ni Malaya human mabutyag sa Quad Comm hearing nga adunay mga Chinese sleeper agents nga nag-operate sa Pilipinas.
Gipahibalo ni Malaya nga ila pang i-validate ang gibutyag sa nag-angkon nga MSS agent nga si She Zhijiang ilabi na nga ang maong indibidwal usa ka wanted nga kriminal.
Gitataw ni Malaya nga posible usab nga usa kini ka disinformation operation nga angay lang i-validate.
Nagdumili si Malaya sa pagkomento sa posibleng pagkalambigit ni Alice Guo sa operasyon sa mga espiya sa China sa nasud.
Sa laing bahin, gisiguro sa Armed Forces of the Philippines (AFP) nga anaa na ang ilang contingency plans kalabot sa operasyon sa mga langyaw nga espiya sa nasud.
Matud ni AFP Spokesperson Col. Francel Margareth Padilla nga ang ilang Intelligence community naghimo sa ilang trabaho sa pagkuha og impormasyon sa operasyon sa mga langyaw nga espiya sa Pilipinas.
Gipasalig sa AFP nga ilang gipatuman ang ilang mandato aron dili madaut ang nasudnong seguridad sa nasud.
