CEBU CITY — Ipatuman sa mga local government units sa mga dakbayan sa Sugbo, Mandaue, ug Lapu-Lapu ang number coding scheme sa mga sakyanan aron ma-regulate ang mga sakyanan sa dalan nunot sa gipatumang enhanced community quarantine.
Miluwat mga mayor sa Metro Cebu og ilang tagsa-tagsa ka mga executive order nunot na sa mas gipahugtang pag-obserbar sa stay-at-home mandate batok sa COVID-19.
Sugod karong Lunes, Abril 20, magdagan sa mga kadalanan ang mga sakyanan nga diin ang ilang plaka nagtapos sa bungkig o odd numbers (1, 3, 5, 7, ug 9) adlaw nga Lunes, Miyerkules, ug Biyernes.
Samtang magdagan sa kadalanan ang mga sakyanan kinsang ang plaka niini nagtapos sa pares o even numbers (2, 4, 6, ug 8), ug zero sa adlaw nga Martes, Huwebes, ug Sabado.
Sa adlaw nga Dominggo, parehong ipatuman sa Mandaue City ug Lapu-Lapu City ang scheduled nga pagpadagan sa mga sakyanan sa dalan.
Magdagan ang mga sakyanang adunay odd numbers sa katapusang numero sa plaka sa panahon sa buntag samtang even numbers usab sa hapon paingon na sa gabii.
Apan walay sakyanan ang magdagan sa adlaw nga Dominggo sa dakbayan sa Sugbo.
Exempted sa maong number scheme ang sakyanan sa mga medical frontliners, delivery vehicle sa mga basic goods, mga adunay emerhensiya, ug uban pa.
