CEBU CITY- Gipahunong sa Cebu City Office of the Building Official (OBO) ang pagtrabaho sa usa ka 12 ka-andanas nga mixed use commercial/residential apartment building sa Brgy. Mabolo ning dakbayan sa Sugbo.
Kini human gironda sa buhatan ang construction site sa Pope John Paul Avenue, Barangay Mabolo, diin naggikan ang natagak nga puthaw nga nakaangol sa usa ka motorista niadtong Miyerkules sa hapon Septiyembre 25, 2024.
Sa pakighinabi sa Bombo NewsTeam ang Arch. Florante Catalan, pangu sa OBO, gitino niini nga ilahang nakita nga aduna kini mga kalapasan sa National Building Code.
Hinungdan nga nipagawas sila og Notice of Suspension Order sa construction site gahapong adlawa, Huwebes Septiyembre 26, tungod sa kakuwang sa safety measures nga mga ekipo dinhi nga nakahatag usab og kadaot sa kinaiyahan ug mga aksidente sa motorista.
Dugang pa, nga malibkas lamang kini kung makatuman na sa construction company ang tanan nga mga rekisitos nga kinahanglan nilang iduso aron makabalik sila og trabaho sa maong building.
Padayon usab ang pahimangno ni Arch.Catalan sa sa publiko ilabina sa mga construction site nga higpit nga ipatuman ang kaluwasan sa lugar aron malikayan ang peligro sa publiko.
Una niini, nabali ang tuong bukton sa usa ka lalaki human aksidenteng naigo sa tubo nga puthaw gikan sa ika-11 nga andana, kinsa dali nga gidala sa Perpetual Succour Hospital.
Giila ang naangol nga si Edgar Rago Gonato Jr., 40-anyos, residente sa 22 F. Jaca Street, Kinasang-an, Barangay Pardo ning dakbayan sa Sugbo.
Sa imbestigasyon sa Mabolo police station, paingon mo-trabaho ang biktima sa dihang kalit lang nga natagak ang 1 1/2 gauge pipe tube nga adunay gitas-on nga lima ka metros gikan sa ika-11 nga andana sa gitukod nga apartment.
