CEBU CITY-Niisyu og suspension of operations ang Office of the Building Official o kon OBO sa usa ka unit sa high-rise condominium sa Brgy. Lahug ning dakbayan sa Sugbo, diin ang usa ka 4-anyos nga batang lalaki nahulog gikan sa ika-27 nga andana niadtong Martes, Abril 9, 2024, samtang nagpaabot sa submission niini.
Pinaagi sa OBO ang kagamhanan sa Siyudad nga gipangulohan ni Architect Florante Catalan, nipahigayon og inspeksyon gahapon, Abril 12, 2024, aron masusi ang safety compliance sa maong building.
Matod ni Catalan, gawas sa ilang pag-inspeksyon sa lugar, ila usab nga gi-verify ang nahitabo sa insidente nga misangpot sa kamatayon sa bata.
Sa pagsuspenso sa mga operasyon sa nasangpit nga unit diin pinaagi sa giluwat nga kamandoan, nagpasabot nga dili usa mahimong puy-an ang maong unit hangtod maseguro sa OBO nga luwas kining puy-an ug maseguro nga dili na masubli pa ang panghitabo.
Gihimug-atan usab ni Architect Catalan atol sa pakighinabi sa Bombo Radyo Cebu News Team nga dili kinahanglan nga ilisan ang tanan nga desinyo sa condo ug butangan og terrace gumikan magamit usab kini s amga panahon nga emergency.
Mipahinumdom usab si Catalan sa mga ginikanan nga doble ang pagbantay sa mga bata ilabi na sa mga masuso nunot sa nahitabong pagkahulog sa bata.
