Gibuhian ni Olivia Yace sa Côte d’Ivoire ang iyang titulo isip Miss Universe Africa and Oceania, pipila lang ka adlaw human siya gikoronahan.
Sa usa ka pahayag nga gipagawas niadtong Nobyembre 24, si Yace miingon nga iyang gipili ang pag-resign aron magpabilin nga matinud-anon sa iyang mga mithi sa pagtahod, dignidad, kahusayan, ug patas nga oportunidad.
Gawas sa pag-resign, hingpit usab niyang giputol ang tanang koneksyon sa Miss Universe Organization (MUO).
Gipasalig sa beauty queen nga ang iyang desisyon mao ang pagpadayon sa pagdasig sa mga batan-ong babaye, ug dili limitado sa usa ka “diminished role” isip continental queen.
Ang iyang pahayag miabut taliwala sa mga alegasyon nga ang mga resulta sa Miss Universe 2025 “gi-rigged” pabor kang Fatima Bosch sa Mexico.
Sumala sa pipila ka mga kritiko, ang kadaugan ni Fatima mahimong naapektuhan sa iyang koneksyon sa presidente sa MUO nga si Raul Rocha.
Wala pa’y opisyal nga pahayag ang MUO kung kinsa ang mopuli kang Olivia.
Samtang, gikumpirma sa organisasyon sa Miss Côte d’Ivoire nga ibalik ni Olivia ang iyang titulo sa MUO.
Ang nahabilin nga mga reyna sa kontinente naglakip sa Miss Universe Asia – Zhao Na (China), Miss Universe Europe – Julia Cluett (Malta), ug Miss Universe Americas – Stephany Abasali (Venezuela).
