Supak sa online gambling si Senador Juan Miguel Zubiri, ug gitawag kini niya nga “silent epidemic” nga hinayhinay nga naglaglag sa mga Pilipino.
Sa pagsugod sa 20th Congress, si Zubiri nisang-at og balaodnon nga nagtinguha sa pagdili sa online nga sugal o ang “Anti-Online Gambling Act of 2025.”
Ang nasigyot nga balaud nagdili sa tanang matang sa online nga sugal sa nasud, ug dili mayanong regulasyon. Naglakip kini sa mga digital betting platform, mobile applications, ug websites nga nagtugot sa mga tiggamit sa pagpusta gamit ang cellphone, tablet, o computer.
Kini naglangkob sa lokal ug offshore-operated nga mga sugal nga mga site nga nagtarget o nagserbisyo sa mga Pilipino nga tiggamit, diin, ang mga digital wallet ug payment service providers sama sa credit card, GCash, PayMaya, ug uban pa gidid-an usab sa pagpadali o pagproseso sa bisan unsang transaksyon nga may kalabotan sa online nga sugal.
Bisan kinsa ang nagpasiugda sa sugal, o nag-anunsyo sa mga site sa pagpusta – bisan sa tradisyonal nga media, social media, o pinaagi sa marketing sa influencer – aduna kini tulubagon.
Ang mga makalapas sa balaud mag-atubang og bug-at nga silot, diin, sa unang kalapasan, multa nga dili mominus ₱20 milyones ug unom ka buwan nga suspensiyon sa lisensya ang ipahamtang, ikaduhang paglapas, ang multa mahimong moabot sa ₱50 milyones ug usa ka tuig nga suspensiyon sa operasyon, samtang sa ikatulo nga paglapas, multa nga labing menos ₱100 milyon, permanenteng pagbawi sa lisensya, nga mahimong mosangput sa unom ka tuig nga pagkabilanggo.|Bombo Irene Ardiente
