Gikabutyag ni Cebu City Councilor ug Chairman sa Committee on Environment nga si Joel Garganera nga susama ra usab siya sa kadaghanan karon nga nibati og kabalaka kabahin sa halapad nga tapok sa basura sa Pond A sa South Road Properties, isip temporaryong labayanan sa basura nga gagikan sa Sugbo.
Mao kini ang gikabutyag ni Garganera atol sa eksklusibong pakighinabi sa Bombo Radyo Cebu kaniya, ug kini nunot usab sa kabalaka nga gipadangat sa kadaghanan ug sa Cebu Electricity Rights Advocate sa estado karon sa SRP may kalabotan na sa basura.
Gani, gipaambit niya nga nitambong siya sa Solid Waste Management seminar ug kini gipasiugdahan sa Cebu City Environment and Natural Resources Office (CCENRO), diin sa maong seminar, lakip ang maong naasoyng suliran ang ilang gihisgutan.
Apan, giklaro ni Garganera nga sa tinud-aray ang Solid Waste Management Board, nga gipangulohan ni Emma Ramas, wala masayud nga aduna na diay galabay og basura sa maong dapit, nga gikonsidera niyang open dumpsite.
Ingun man dako nilang katingala sa nakita nila sa social media, ang mga drone shot videos nga aduna na diay open dumpsite sa maong dapit.
Samtang, naasoy usab ni Garganera nga sa pipila ka semana ang milabay, nisugyot sila sa Solid Waste Management Board ang paggama temporary transfer station, diin adunay pagahimuon nga estruktora nga magtugot makasaka ang mga sakyanan nga nagdala og basura, dayun i-dump kini sa naka-standby nga sakyanan isip private service provider, ug mao nalang kini ang modiretso sa pinal nga destinasyon nga depository landfill.
