TALISAY CITY, CEBU- Gipapauli sa tagsa-tagsa nila ka panimalay ang mga empleyado sa Talisay City Hall kagahapong adlawa, Martes, Abril 28, kini gumikan sa usa Bomb Threat nga giingong anaa sa sa 3 ka building sulod sa compound.
Subay sa gipahibalo ni Talisay City Mayor Samsam Gullas sa iyahang facebook post, aduna siya’y mensaheng nadawat gikan ni “Mary Ann Pitogo” kabahin sa bomb threat, hinungdan nga diha-diha dayong nakig-coordinate ang lokal nga panggamhanan sa Talisay City Police Station ug SWAT team aron masiguro ang kaluwasan sa tanan ug mapahigayon ang komprehensibong inspeksyon sa maong lugar.
Sa maong insidente, ubay-ubay usab nga mga indibidwal ang nasagmuyo gumikan kay aduna silay mga nagkadaiyang tuyo sa Talisay City Hall, apan wala nay na-abtan nga mga empleyado tungod kay gipapauli man kini, subay sa pagpaniguro sa matag kaluwasan niini.
Apan, sa pakigsusi ug pagresonde sa mga sakop sa Explosived Ordnance Disposal (EOD), pakyas kining nakakaplag og bomba.
Busa, gipasabot ni Julius Hilig ang gwardiya sa Talisay City Hall ngadto sa mga katawhang napakyas sa ilahang katuyuan nga pabalikon nalang karong adlawa, gumikan kay balik-normal naman ang operasyon sa maong City Hall.
Samtang, gitino usab nga bisan pa nga posibleng peke ang account nga nagpadala sa mensahe, apan nag-ingun ang mga otoridad nga dili angay ibaliwala ang bisan unsang hulga nga mahimong magbutang sa kinabuhi sa peligro.
Ingun man nga gipahinumdoman usab ang publiko nga ang pagpakatap og peke nga bomb threat o “bomb joke” usa ka seryosong kalapsan ubos sa Presidential Decree No. 1727, nga mahimong mosangpot sa pagkabilanggo, o multa.
