CEBU CITY- Dalitan og mga kahimanang pangpaugnat sa kusog ang pasilidad sa Operation Second Chance sa Barangay Kalunasan sa bukirang bahin sa dakbayan sa Sugbo aron sa tinguha nga adunay recreational activity ang mga Children in Conflict with the Law (CICL).
Kini ang gibutyag ni Cebu City Councilor Dave Tumulak atol sa eksklusibong pakighinabi sa Bombo Radyo Cebu News Team diin gisaysay niini nga maayong tagaan og sports equipments ang maong pasilidad nga maoy ikaduhang panimalay sa mga kabatan-onan nga nalambigita sa kriminal nga kalihukan ug gipaubos sa rehabilitasyon.
Saad pa ni Tumulak nga pagabisitahon kini niya matag higayon aron kumustahon ang kahimtang sa maong pasilidad nunot na sa nahitabong pag-iskapo sa 13 ka mga CICL niadtong Miyerkules sa buntag, Septiyembre 3 tungod kay daw pipila nila ganahan mamista, mag-basketbol, o mubisita sa ilang pamilya.
Sa ulahing taho kay napanumbalik na ang tanang 13 ka mga CICL nga mi-iskapo inabagan sa mga personahe sa Guadalupe ug San Nicolas Police Station sa Cebu CIty Police Office ug mga sakop sa Cebu City Government.
Gani sugyot sa opisyal nga posibleng tauran og barbed wire ang kural sa pasilidad aron dili na mausab ang panghitabo sa pag-iskapo sa mga CICL.
Dugang pa sa konsehal nga bana-bana niini kay adunay 100 ka mga CICL ang pasilidad nga gidumala sa kagamhanang dakbayan kabahin sa pagpanumbalik sa komunidad sa mga CICL nga adunay paglaum sa bag-ong kinabuhi.
