CEBU – Gituyu ang pagsunug sa opisina sa KAPA-Community Ministry, Inc. sa Sitio Jaica, Barangay Poblacion, lungsud sa Compostela.
Gisaysay ni SFO1 Gina Labay, ang chief investigator sa BFP-Compostela nga basi sa ilahang inisyal nga imbestigasyon, aduna sila’y nakita nga mga container nga adunay sulud nga gasolina sa gawas sa building sa KAPA.
Matud pa nga adunay napulu ka mga armado nga lalaki ang misulud sa building, gipukaw ang anaa sa napulu ka mga staff sa KAPA, gikuha ang ilahang mga cellphone ug kwarta.
Dugang pa niini, gipagawas sa mga nahisgutang kalalakin-an sa building ang maong mga staff ug didtu gibubu ang gasolina sa second floor ug giduslitan.
Una niini, pasado ala una kaganihang kaadlawun, usa ka Michael Edward Dagatan nga taga Guimbal, Compostela, ang mi-report sa nahisgutang sunug sa KAPA office hinungdan nga dali kining girespondihan sa kabomberohan.
Gilamuy sa kayo ang duha ka 2-storey building sa KAPA nga gibana-banang mukabat sa P640,000 ang natala nga danyos.
Usa ka ‘robbery with arson’, sigon pa ang maong insidente.
Samtang, hugut ang baruganan ni Compostela Mayor Joel Quiño nga ipadayun niini ang kaso nga gipasaka batuk sa KAPA-Community Ministry, Inc. bisan pa man ug nasunug ang opisina niini kaganihang kaadlawun.
Gibutyag ni Mayor Quiño nga ang susamang insidente ang iyahang gilikayan nga adunay mahitabu sulud sa iyahang lungsud nga wala kinikasayuran.
Kahinumduman nga una nang gipahibalu sa mayor nga wala mag-agi sa iyahang opisina ang KAPA, ingun man nga wala kini magkuha ug business permit.
