Gisugdan na ang pagtukod sa gipaayo ug mas mahigalaon nga Santa Fe Port sa Cebu Provincial Government human sa groundbreaking ug capsule-laying ceremony nga gipangulohan ni Cebi Provincial Governor Gwendolyn Garcia niadtong Hunyo 20, 2024.
Gitambungan kini nila ni 4th district Congresswoman Janice Salimbangon, Santa Fe Mayor Ithamar Espinosa, Board Member Carmela Franco, ug Cebu Port Authority (CPA) General Manager Francisco Comendador III.
Mogasto ang Kapitolyo og labing menos P277.6 milyones alang sa unang duha ka hugna sa proyekto.
Gigahinan ang phase 1 og P145.2 milyones, ug ang phase 2 makadawat og kapin sa P110 milyones nga pundo.
Dugang pa, P22.3 milyones ang gigahin alang sa demolisyon ug paglabay sa kasamtangang rock causeway.
Mipamahayag si Gobernador Gwen nga ang mga materyales gikan sa giguba nga causeway maoy gamiton sa paghimo sa extension sa runway sa Bantayan Island Airport.
Gipakita sa mga pagtuon sa kalikopan nga ang naglungtad nga rock causeway sa pantalan nagpahinabo sa dili patas nga pag-apod-apod sa pinong balas sa Santa Fe nga nailhan sa tibuuk kalibutan tungod sa limpyo nga puti nga mga baybayon sa balas – tungod kay gibabagan niini ang libre nga pag-agos sa balas ug tubig.
Kahinumduman nga niadtong Hunyo 2023, gipahibalo sa Gobernadora nga giaprobahan sa CPA ang hangyo sa Kapitolyo nga magtukod og bag-o ug environmentally friendly nga pantalan sa Santa Fe.
Gitugotan usab sa CPA ang Probinsiya sa Sugbo sa pagdumala ug pag-operate sa bag-ong pantalan kon mahuman na ang pagtukod niini.
