Gipasiugda ni Atty. James Vincent Santiago, ang Acting Chief sa Operations Division sa Land Transportation Office Region 7 (LTO 7), ang pagbaton og disiplina ug ang pagpraktis sa “defensive driving” sa tanang panahon.
Matod ni Santiago, ang pagmaneho sa kadalanan dili lang mahitungod sa kaugalingong kinabuhi, kondili mahitungod usab sa kinabuhi sa ubang tawo.
Gipunting niya nga ang aksidente sa dalan adunay seryosong epekto sa mga pamilya sama sa usa ka amahan nga mahimong dili na makapauli, o kaha ang uban nga mahimong maangol ug madaot ang kaugmaon.
Tungod niini, naglatid ang opisyal og pipila ka mga giya ug lagda sa kadalanan: Pagmaneho nga Luwas, Share the Road, ilhon ug ipatigbabaw ang pagkaparehas sa paggamit sa kadalanan.
Pagrespeto ug Pagkamahigalaon, magmabination ug magpakita og respeto ngadto sa ubang mga drayber. Hinumdomi kanunay nga ang labing importante mao ang luwas nga pag-uli sa panimalay.
Gipaambit usab niini ang paglusad sa Land Transportation Office Region 7 og mga operasyon alang sa “Oplan Undas 2026” usa kini ka tinuig nga pamaagi matag hapit na ang Kalag-kalag.
Gikanayon niya nga ang maong “Oplan Undas 2026” usa ka kalihokan nga molungtad og duha ka semana. Diin ang tumong niini mao ang pagmintinar sa kaluwasan sa kadalanan ug pagsiguro nga ang mga sakyanan anaa sa maayong kondisyon alang sa pagbiyahe.
Isip kabahin sa maong operasyon, gipatuman usab sa ahensya ang estriktong inspeksyon sa mga terminal, sa wala pa ug atol sa pag-grupo sa mga pasahero alang sa Undas.
