METRO MANILA-Gihimakak sa National Security Council Assistant Director General Jonathan Malaya, nga ang habig sa Pilipinas nangayo og pagtugot gikan sa China o misaad bugti sa malampusong rotation ug reprovisioning mission ngadto sa BRP Sierra Madre sa Ayungin shoal.
Gisubli usab ni Malaya ang giingon sa DFA nga sayop nga representasyon sa kamatuoran.
Matod niya, walay filing, walay inspeksyon, ug walay pahibalo sa China.
Gihimo ni Malaya ang pamahayag isip tubag sa pangangkon sa China nga ang gobyerno sa Pilipinas nangayo sa Beijing og pagtugot nga makasulod sa Ayungin Shoal.
Gipahibalo usab sa opisyal nga ang RoRe mission team ang naghatod sa suplay sa Navy personnel nga nagbantay sa barko ug malampusong nakompleto ang rotation sa mga tropang Pilipino.
Siya usab miingon nga walay dili maayo nga insidente, walay peligrosong maniobra, walay water cannon, walay laser nga insidente ug walay ramming o bangga.
Malinawon nga gipahigayon ang RoRe bisan pa sa presensya sa 4 ka barko sa Chinese Coast Guard ug 3 ka barko sa People’s Liberation Army ug 2 ka Chinese maritime militia sa maong lugar.
Ang mga barko sa China nagpadayon sa ilang gilay-on ug gipasagdan nga hapsay nga molawig ang RoRe mission team sa PH.
Sa laing bahin, si Malaya niingun nga ang kalampusan sa malinawon nga RORe niadtong Sabado gumikan sa bag-ong negosasyon o kasabutan tali sa gobyerno sa Pilipinas ug China karong bag-o.
